வெளிநாடு வாழ் தமிழர் நலத்துறை அமைச்சர்
சிறுபான்மையினர் நலன் மற்றும் வெளிநாடு வாழ் தமிழர் நலத்துறை அமைச்சர் மாணவர்களை பத்திரமாக தமிழகம் அழைத்து வர நடவடிக்கை எடுப்பதாக உறுதி அளித்துள்ளார். பெரும்பாலான மாணவர்கள் விமான சேவைக்காக காத்திருக்கிறார்கள். சாலைகள் பாதுகாப்பாக இல்லாததால் அவர்கள் பயணம் செய்ய விரும்பவில்லை. கல்விச் சுற்றுலா சென்ற நான்கு மாணவர்கள் மட்டும் சாலை மார்க்கமாக டெல்லிக்கு சென்று, மே 10-ம் தேதி தமிழகம் திரும்ப திட்டமிட்டுள்ளனர்.

24 மணி நேரம் செயல்படும்
டெல்லி தமிழ்நாடு இல்லத்தில் உதவி மையம் 24 மணி நேரமும் செயல்படும். மாணவர்களின் நிலை குறித்து அவ்வப்போது தகவல்கள் தெரிவிக்கப்படும். உதவி மையத்தின் தொலைபேசி எண்கள்: 011-24193300 (லேண்ட் லைன்), 9289516712 (WhatsApp வசதியுடன் கூடிய மொபைல் எண்). "மாணவர்கள் அனைவரும் பாதுகாப்பாக தமிழகம் அழைத்து வரப்படுவார்கள்" என்று அரசு உறுதியளித்துள்ளது. மாணவர்கள் எந்தவித அச்சமும் இல்லாமல் தைரியமாக இருக்க வேண்டும் என்று அதிகாரிகள் தெரிவித்துள்ளனர்.

டெல்லி வந்தடைந்தனர்
இந்நிலையில் நேற்று இரவு ஜம்மு காஷ்மீரில் தங்கிப் படித்து வரும் தமிழ்நாட்டு மாணவர்கள் பாதுகாப்பாக டெல்லி தமிழ்நாடு இல்லம் வந்தடைந்தனர். இன்று காலை சென்னைக்கு வருகின்றனர். ஜம்மு காஷ்மீரில் மொத்தம் 41 தமிழ்நாட்டு மாணவர்கள் பயிலும் நிலையில், முதல் பகுதியாக 12 மாணவர்கள் டெல்லி வந்தடைந்தனர். எல்லையில் போர் பதற்றம் அதிகரித்துள்ள நிலையில், தமிழ்நாடு அரசின் ஏற்பாட்டில் அழைத்து வரப்படுகின்றனர். மீதமுள்ள மாணவர்கள் விரைவில் அழைத்து வரப்படுவார்கள் என்று கூறப்பட்டுள்ளது.