கலைஞர் கருணாநிதியின் பிறந்தநாளான ஜுன் 3 முதல் இன்பநிதி கலைஞர் தொலைக்காட்சியில் பணி புரிய தொடங்கியுள்ளதாக கூறப்படுகிறது.

முதல்வர் முக ஸ்டாலினின் பேரனும் துணை முதல்வர் உதயநிதி ஸ்டாலினின் மகனுமான இன்பநிதி தாத்தா மற்றும் அப்பாவின் ரூட்டையே கையிலெடுத்துள்ளதாகவும், அதன் முதல் படியில் அடியெடுத்து வைத்து விட்டதாக தகவல் வெளியாகி அரசியல் வட்டாரத்தில் அதிர்வலையை ஏற்படுத்தியுள்ளது. 

முக ஸ்டாலின் மகனான உதயநிதி ஸ்டாலினும் கிருத்திகாவும் கடந்த 2002 ஆம் ஆண்டு காதலித்து திருமணம் செய்து கொண்டனர். இந்த தம்பதிக்கு இன்பநிதி தன்மயா என இரண்டு குழந்தைகள் உள்ளனர். மூத்த மகனான இன்பநிதி சமீபத்தில் தான் லண்டனில்  நிதி நிர்வாகம் தொடர்பான தனது பட்டப்படிப்பை முடித்துள்ளதாக கூறப்படுகிறது.

கலைஞர் கருணாநிதி, முக ஸ்டாலின், உதயநிதி ஸ்டாலின் வரிசையில் திமுகவின் அடுத்த அரசியல் வாரிசாக பார்க்கப்படும் இன்பநிதி, கடந்த சில மாதங்களாகவே கட்சி நிகழ்ச்சிகளில் கலந்து கொள்கிறார். சேலத்தில் நடைபெற்ற இளைஞரணி மாநாட்டில் அப்பா உதயநிதி ஸ்டைலில் கட்சி சின்னம் பதித்த டிஷர்ட் அணிந்து பங்கேற்றார். அதன்பின் பொங்கல் சமயத்தில் மதுரையில் நடைபெற்ற ஜல்லிக்கட்டு நிகழ்ச்சியிலும் உதயநிதியுடன் கலந்து கொண்டார். 

இப்படி தற்போதே மகனை அரசியலுக்கு அறிமுகம் செய்ய தொடங்கி விட்டார் உதயநிதி என விமர்சனங்கள் எழுந்தது. இந்நிலையில் தற்போது கல்லூரி படிப்பை முடித்த இன்பநிதி கலைஞர் டிவியின் நிர்வாக பிரிவில் பணிபுரிய தொடங்கியுள்ளதாக தகவல் வெளியாகி உள்ளது. 

கலைஞர் கருணாநிதியின் பிறந்தநாளான ஜுன் 3 முதல் இன்பநிதி கலைஞர் தொலைக்காட்சியில் பணி புரிய தொடங்கியுள்ளதாக கூறப்படுகிறது. காலை 11 மணி முதல் 5.30 மணி வரை அண்ணா அறிவாலயத்தில் உள்ள கலைஞர் தொலைக்காட்சியில் இன்பநிதி நிர்வாக பணிகள் குறித்து முக்கிய நிர்வாகிகளுடன் ஆலோசனை மேற்கொண்டு வருவதாக கூறப்படுகிறது. 

கலைஞர் குடும்பத்திற்கு சொந்தமான கலைஞர் டிவி மற்றும் முரசொலியின் நிர்வாக பொறுப்பில் ஸ்டாலின் முதல் உதயநிதி வரை பணி புரிந்துள்ளனர்.  மு.க.ஸ்டாலின் தீவிர அரசியலில் ஈடுபடுவதற்கு முன்பு முரசொலி அலுவலகத்தில் பணியாற்றி வந்தார். அதேபோல முரசொலி நிர்வாகத்தை கவனிக்கவே அழகிரி மதுரைக்கு அனுப்பப்பட்டார். மேலும், துணை முதல்வர் உதயநிதி ஸ்டாலினும் முரசொலியின் நிர்வாக இயக்குனராக பணியாற்றி உள்ளார். அந்த வகையில் தான் இன்பநிதி கலைஞர் டிவி நிர்வாக பொறுப்பில் இணைக்கப்பட்டுள்ளார். இதனையடுத்து விரைவில் இன்பநிதியின் அரசியல் பிரவேசமும் நடைபெறும் என்ற எதிர்பார்ப்பு எழுந்துள்ளது.

செய்தியாளர் மு.கார்த்திக் புதிய தலைமைச் செய்தி