விதிகளின்படி, தேர்தல் முடிவை எதிர்த்து நீதிமன்றத்தில் தாக்கல் செய்யப்பட்ட தொகுதிகளை தவிர்த்து, மற்ற தொகுதிகளில், முடிவுகள் அறிவிக்கப்பட்ட இரண்டு மாதங்களுக்குள் மின்னணு ஓட்டுப்பதிவு சரிபார்ப்பு செயல்முறை முடிக்கப்பட வேண்டும்.

2024 லோக்சபா தேர்தலையொட்டி, தேர்தல் கமிஷன் புதிய வழிகாட்டு நெறிமுறைகளைவெளியிட்டது.

அதன்படி, மின்னணு ஓட்டுப்பதிவு இயந்திரங்களை தயாரிக்கும், 'பாரத் எலக்ட்ரானிக்ஸ் லிமிடெட், எலக்ட்ரானிக்ஸ் கார்ப்பரேஷன் ஆப் இந்தியா லிமிடெட்' ஆகிய நிறுவனங்களின் இன்ஜினியர்கள் முன்னிலையில், சம்பந்தப்பட்ட வேட்பாளர் மின்னணு ஓட்டுப்பதிவு இயந்திரம் அல்லது 'விவிபாட்' எனப்படும் வாக்காளர் ஒப்புகை சீட்டு இயந்திரத்தை தேர்வு செய்ய வேண்டும் என தெரிவிக்கப்பட்டிருந்தது.

முன்மொழிவு

இதை எதிர்த்து உச்ச நீதிமன்றத்தில் வழக்கு தொடரப்பட்டது. பிப்., 11ல் விசாரித்த அப்போதைய தலைமை நீதிபதி சஞ்சீவ் கன்னா தலைமையிலான அமர்வு, 'மின்னணு ஓட்டுப்பதிவு இயந்திரங்கள் சரிபார்ப்பு செயல்முறை என்பது, ஓட்டுப்பதிவு தரவை அழித்து மீண்டும் ஏற்றுவது என சிக்கலாக இருக்கக்கூடாது' என குறிப்பிட்டது.

மே 9ல் இந்த வழக்கு மீண்டும் விசாரணைக்கு வந்த போது, வேட்பாளர்களால் சரிபார்ப்பு கோரப்படும் மின்னணு ஓட்டுப்பதிவு இயந்திரங்களின் தரவுகள் நீக்கப்படாது என்ற தேர்தல் கமிஷனின் முன்மொழிவை உச்ச நீதிமன்றம் ஏற்றுக் கொண்டது.

அதே சமயம், மின்னணு ஓட்டுப்பதிவு இயந்திரங்களின் சேமிப்பு தகவல்கள், மென்பொருள் சேதப்படுத்தப்படவில்லை என, அதன் தயாரிப்பு நிறுவனங்களின் இன்ஜினியர்கள் சான்றளிக்க வேண்டும் என்றும் நீதிமன்றம் யோசனை கூறியது.

விளக்கம்

இந்நிலையில், மின்னணு ஓட்டுப்பதிவு இயந்திரங்களின் சரிபார்ப்பு செயல்முறையை அடுத்த சில வாரங்களில் துவங்க தேர்தல் கமிஷன் முடிவு செய்துள்ளது. அதன்படி, சட்டசபை தேர்தல் தொடர்பாக பல்வேறு சர்ச்சைகள் நீடிக்கும் மஹாராஷ்டிராவில், இந்த செயல்முறை விரைவில் துவங்கப்பட உள்ளது.

இது, மஹா விகாஸ் அகாடி கூட்டணியின் சந்தேகங்களை தீர்க்கும் என, கூறப்படுகிறது. தேர்தல் முறைகேடுகள் தொடர்பான எதிர்க்கட்சியினரின் குற்றச்சாட்டுகளுக்கு இந்த செயல்முறை உரிய விளக்கத்தை அளிக்கும் என்றும் சொல்லப்படுகிறது.